Kategoria: Berriak

Azterketak ate joka ditugu, eta inportantea da jakitea zein egunetan zein azterketa egin behar duzun, bai eta zein den ordu aldaketa eskatzeko eta azterketa errebisatzeko araudia ere. Zeregin horretan laguntzeko asmoz, informaziora ailegatzeko bidea gogorarazi nahi dizugu:

-Sartu gure web-gunean, eta klikatu “HIZKUNTZAK” paratzen duen tokian. Hor, hauta ezazu zuri dagokizun hizkuntza.

-Zabalduko zaizun orrian, hauta ezazu “Azterketak”.

-Eta zabalduko zaizun orrian, informazio inportante guzia aurkituko duzu: ikasle ofizial zein libreen azterketen egutegia, ordu aldaketa eskatzeko araudia eta probak berrikusteko eskatzeko araudia.

Kafka irakurtzea beti da ideia ona, edozein urtetan eta, itzulpena txukuna bada, edozein hizkuntzatan. Baina, hil zenetik ehun urte pasatu direla aprobetxatuta, Iruñeko Hizkuntza Eskolan gogora ekarri nahi izan dugu zeinen idazle zoragarria izan zen  den Franz Kafka, eta zer-nolako maisulanak utzi zizkigun.

Eta alemanez idatzi zuenez, normala da Aleman Departamentua bigarren solairuan ikusgai duzuen erakusketa prestatzeaz arduratu izana. Ez dakizula alemanez? Lasai, testu guziak alemanez ez ezik, euskaraz eta gaztelaniaz ere prestatu baititugu.

Kafkiarra zer den azalden duen panelaren ondoan, aleman ikasleek egiazko egoera kafkiar batzuk kontatu dituzte; zuk ere bat idazten baduzu ikasten ari zaren hizkuntzan, zozketatuko ditugun Kafkaren irudia daramaten hiru oihalezko poltsa bat irabazteko aukera izanen duzu. Paneletan dauden QRak eskaneatuz gero, informazio gehigarria eta quiz batzuk egiteko aukera izanen duzu (quizeko parte hartzaileen artean ere oihalezko poltsa batzuk zozketatuko ditugu).

Bertzalde, Eskolako baliabide gelan Kafkaren eta Kafkari buruzko liburu sorta ederra duzu ikusgai: Kafkak berak idatzi zituenak, Kafkaren biografia nagusiak, Kafkari buruzko saiakerak, bai eta komikiren bat ere. Baina guk kontatzea baino hobe da zu zerorri liburutegira joatea eta zure begiekin ikustea.

Lan handia egin dugu erakusketa hau prestatzeko, eta gustuko izatea espero dugu.

Literatura pixka bat gustatzen bazaigu eta liburu artean denbora tarte batzuk eman baditugu, segur aski zer liburu irakurri ditugun ikusita asma liteke nolakoak garen. Ez da definitzen gaituen gauza bakarra, jakina, baina elkarren ondoan edo elkarren gainean paratuko bagenitu gustatu zaizkigun eta gustatu ez zaizkigun liburuak, irakurri ditugunak, erosi bai baina oraindik irakurri ez ditugunak eta noizbait erosi eta irakurri nahi genituzkeenak, juntatuko bagenitu biziki gomendatu ditugun liburuak eta basaki kritikatu ditugunak, bada, seguruenik gure potreta moduko bat aterako litzateke.

Apiril honetan, horixe eskatu nahi dizuegu guk ere, alegia liburuak elkartzea, bata bertzearen gainean paratzea, izenburuekin ustekabeko poesia sor dadin. Eta, akaso, sortuko den poesia hori zuen erretratu txiki bat izanen da. Edo ez. Baina, beti bezala, parte hartuz gozatzearekin batera, sari bat irabazteko aukera ere izanen duzu. Ikusi oinarriak hementxe.

2023-2024 ikasturteko matrikula librerako onartuen eta ez onartuen behin betiko zerrendak agertu dira.

• Onartuak
• Ez onartuak

Hizkuntza bat ikastea bide luzea izaten da, eta, aukeran, hobe da A1etik C2ra doan bidaia horretan ahalik eta hobekien pasa dezagun. Horretarako, tresna bikaina da umorea. 

Gure pentsamenduak oraindik ongi ezagutzen ez dugun hizkuntza batean adierazten saiatzen garenean, hamaika gaizki-ulertu irri-emangarri sortzen dira, eta, irri-emangarriak direnez, bada, horixe, irri egiteko aprobetxatu beharko genituzke. Meme bat eginez, adibidez. Euskaran ez dago proba eta froga bereizteko manerarik? Katarroa zenuen egun batean frantses klasera zergatik ez zinen joan azaltzeko j’étais constipé erran zenion irakasleari? Oraindik picsa deitzen diozu Italiako talo goxo horri? Bada, hortxe duzu meme bat sortzeko materiala eta, bidenabar, sari bat irabazteko aukera.

Zer egin behar duzun jakin nahi baldin baduzu, hementxe dituzu oinarriak. Anima zaitez, erraza da-eta.

Hirugarren urtea da Nafarroako Filmotekarekin elkarlanean Iruñeko Hizkuntza Eskola Ofizialak Idatzia / Filmatua zikloan parte hartzen duela. Ohikoa den bezala, aurten ere lau film interesgarri ikusteko parada izanen dugu (laurak Eskolako irakasle banak aurkeztuak), eta, segur aski, emanaldiaren ondotik, bat baino gehiago animatuko dira pelikularen oinarri izan den liburua hartzera eta irakurtzera. Nahi izanez gero, Nafarroako Liburutegian hartzen ahalko dira liburu horiek (Miren Gorrotxategiren 33 ezkil, Friedrich Dürrenmatten Das Versprechen, Giorgio Bassaniren Il giardino dei Finzi-Contini, John Fanteren My Dog Stupid), baina ez ahaztu Eskolan ere Baliabide Gela zoragarria dugula eta liburu horiek guziak jatorrizko bertsioan aurkitulu dituzuela haren apaletan. Bide batez erranda, Baliabide Gelako txartela erakutsiz gero, bi euro ordainduko duzue Filmotekako emanaldietan, ohiko hiruren ordez. Abantailak bertzerik ez baitu gure Baliabide Gelatik pasatzeak!

Erasmus berri bat frantses ikasleentzat. B1etik aurrera

 Egin klik hemen informazio guztia ikusteko.

Maiz, ohartu gabe egiten dugu: historia erraten dugularik, gizonen historia erran nahi izaten dugu, edota kirola, musika edo literatura erraten dugularik, gizonen kirola, musika edo literatura erraten ari gara. Ez nahitaez asmo gaiztoz. Baina baita, batzuetan, asmo gaiztoz ere.

Kontua da aunitz direla emakume izate hutsagatik azpiratuak, atzenduak, baztertuak gelditu diren emakumeak; orobat, emakumeen askatasunerako bidean mugarri izan diren data eta gertakari ugari bigarren planoan gelditu dira, eta ez dira mereziko luketen bezain ezagunak.

Hizkuntza Eskolan prestatu dugun quiz honekin, ikasten ari zaren hizkuntza praktikatzeko aukera emateaz gainera, emakume, data eta gertakari horietako batzuk gogora ekarri nahi izan ditugu. Eta, jakina, galdera guziak asmatzen dituztenen artean, 50na euroko hiru bono zozketatuko ditugu. 

Martxoaren 6tik 22ra (biak barne) duzu quiza egiteko epea; eta bonoaren irabazleei martxoaren 27an mezu bat igorriko zaie. Quiza non dagoen? Klikatu hementxe.