Hilabetea: azaroa 2023

Abenduan sartzeko zorian gaude, eta abenduarekin batera hainbat ohitura eta tradizio berriz bizitzeko aukera izanen dugu: Olentzero etorriko zaigu, familiarekin elkartuko gara mahaiaren inguruan… Urte batzuk dira Iruñeko Hizkuntza Eskolan ere tradizio berezi bat martxan paratu dugula: Abenduko egutegia. Galdera batzuen erantzuna asmatuz gero, opari bat jasoko duzu Olentzero ailegatu baino lehen ere. Gehiago jakin nahi? Bada, hementxe dituzu behar dituzun azalpen guziak.

Onartzen diren hutsegiteak gainditu dituzten ikasleen zerrenda argitaratu da.

Ziurtagiriak aurkezteko epea: Azaroaren 24ko 9:00etatik abenduaren 1eko 14:00ak arte (instantzia eta alegazioak mail bidez bidal daitezke eoip.admin@educacion.navarra.es helbidera).

Emaztekien kontrako indarkeria desagerrarazteko eguna ospatuko dugu azaroaren 25ean. Seguru gara Iruñeko Hizkuntza Eskola Ofizialean inor ez dagoela indarkeriaren alde. Begi-bistako kontua baita. Jendarte normal batean biziko bagina, segur aski gaia ez genuke aipatu ere egin beharko. Baina albisteak irakurtzen ditugu. Telebista ikusten dugu. Eta badakigu gauza batzuk argi eta ozenki erran behar direla. Horregatik, Eskola honetan argi eta ozenki erran nahi izan dugu gaitzetsi egiten dugula emaztekien kontrako indarkeria oro, borroka horretan ez dagoela aitzakiarik. Eta aurpegia ere eman dugu, bideo honetan ikusten ahal duzun bezala.

Azaroaren 25ean Emaztekien Kontrako Indarkeria Desagerrarazteko Nazioarteko Eguna dugu; Iruñeko Hizkuntza Eskola honetan –erran beharrik ez da baina badaezpada erranen dugu–, ez dugu emaztekien kontrako indarkeriarik onartzen. Horren kontra gauza anitz egiten ahal dira, bistan dena; gu hizkuntza zaintzetik hasiko gara, hizkuntza inklusiboa bulkatzetik hain zuzen ere. Horretarako, komenigarria da, lehenik eta behin, hizkuntza inklusiboa zer den, eta zein diren haren abantailak eta haren gaineko mitoak ezagutzea. Hori guzia ikasteko, Nerea Aguado aditua ekarriko dugu Eskolara azaroaren 21ean, hizkuntza inklusiboaren abantailaz eta mitoez mintzatuko zaiguna, eta erabiltzen hasteko gako batzuk emanen dizkiguna. Arratsaldeko 19:00etan, Areto nagusian izanen  da.

Benidormetik etorri zen izebak egongelako apalategian paratzeko sevillana ekarri zizun opari? Hogei urte dituzun arren, Varón Dandy kolonia erosi dizute? Maite duzun pertsona berezi horrek munduko oparirik politena egin dizu? Hain gogoko zenuen aitatxik maitasun handiz eman zizuna gordea duzu baina ez dakizu non jarri? Geroago etsai bihurtu den lagun minaren opariak gorrotagarri bihurtu dira bat-batean? Berdin da, oparia edozein dela ere, orain duzu etekina ateratzeko aukera. Egiozu argazki bat, kontatu haren historia ikasten ari zaren hizkuntzan eta bidal iezaguzu. Ez dagoela argi? Bada, badaezpada, lehiaketa honen oinarriak hementxe dituzu.