Hilabetea: urria 2023

Ohartzen ez garen arren, gure artean dabiltza. Euskara irakasle mozorropean sartu zaizkigu eskolara. Eskaileretan normal-normal agurtzen gaituzte. Baina auskalo gauez ez ote duten hilkutxa batean lo egiten, batek daki ilbetea dagoelarik ez ote diren gizotso bihurtzen. Guk dakigula, bi dira. Raibabelen odola, sorginak, txorimaloak, hiltzaile maskaradunak eta bertzelako izugarrikeriak mintzagai dituen podcast bat martxan paratu dute (hementxe aditzen ahal dena, bidenabar erranda). Orain, urriaren 31 hurbil dagoen honetan, Gau beltza ate joka dugularik, galdetegi bat prestatu digute, beldurrezko zinemari buruzko galdetegia, hain zuzen ere, urriaren 30etik azaroaren 2ra hementxe klikatuz gero egiten ahalko duzuena. Zu banintz, ni saiatuko nintzateke egiten, Irati filmaren hiru DVD zozketatuko baititugu irabazleen artean. Ikaragarria izanen da.

Gelan, ederki pasatu duzue elkarrizketa hori prestatzen. Irri ajataka aritu zarete galderak eta erantzunak asmatzen. Ezin dibertigarriagoa izan dira baten burutazioak eta bertzearen ateraldiak. Eta hori guzia grabatu eta Eskolaren web-gunean paratuko bazenute, guk ere zuekin batera irri egin eta primeran pasa dezagun? Hizkuntza Eskolako 2. solairuan Raibabel grabazio estudioa dugu: etorri zuen irakaslearekin eta ekarri klasean prestatu dituzuen saio, azalpen, elkarrizketa, antzezlan, gogoeta, irakurketa edota jokoak. Ez zaretela ausartzen? Lasai, gure teknikariak atsegin handiz behar duzuen guzian lagunduko dizue eta. Etorri, sari bat irabazteko ere aukera baituzue. Nola? Bada, hori jakiteko, irakur itzazue arauak hemen.